|
|
|
লৌউ-শিংউবা
ভারতকী অপুনবা মীওই ৬০% মুক্কী হিংনবগী পাম্বৈদী লৌউ-শিংউবনা পীরি৷ জি ডি পিগী শরুক খরদা তত্তনা হন্থরক্লবসু, লৈবাকসিদা মসিনা খ্বায়দগী চাওরবা শেলমীত লোনগী কয়াত অমা ওইনা লৈরি৷ তপ্না অমসুং ইথা-থাজদবা মওংদা হোংলক্লীবা হেঙ্গতপগী চাং অমসুং লৈবাক মনুংগী মচি-মচিদা থোক্লীবা লৌ-ইঙ্খোলগী ৱাথোক্তা হন্দক মরক মশক থিনা হেঙ্গতলকপা মশিংগী চাং হায়রিবশিংসিনা জাতিগী চিঞ্জাক ঙাক-শেন থবক্তদা নত্তনা জাতি পুম্বগী ওইবা শেলমীতলোনগী ফজবা মশক্তা অকিবা ধমকা অমা ওইরি৷
লৌউ-শিংউগী থবক্তা অকক্নবা হিরম কয়াদা খোংলৌ ওইরিবশিং এন কে সিনা মশক তাকপা ঙমখ্র৷ লৌউ-শিংউবগী লৌশিংবু পাংথোকপদা থাক ৱাঙ্খতনবা, অমদি ফার্মগী (লল্লোন-কাংবু) অফংবা চাগা অমসুং কান্ননীংঙায় পোত্থোক পুথোকপগী চাংবু হেঙ্গতহন্নবা, এন কে সিনা ইন্দিয়ান কাউন্সিল ফোর এগ্রিকলচরেল রিসার্স (লৌউ-শিংউবগী মরীদা থি-হুম্বগীদমক লৈরীবা ভারতকী ৱাতান্নফম মীফম), আই সি এ আর, হায়রিবসিগা খুতশম্নরগা পুন্ন-পুন্না পোত্-চৈ লৈবা তোঙানবা লল্লোনশিং অমসুং খঙ-হৈরবা কাংবুশিংবু নেক্লগা লেপ্তনা ময়াম পুন্না উন্নবগী মীফম মথং-মনাওদা পাংথোকই৷ হায়রিবা মীফমদুগী পান্দম মরি শুই, মশীং পল্লবদা-লৌরোক মতুংগী শেম-শাবদা চংগদবা মচাক-মথুমগী শকওং, রাসায়নগী মতেংনা লৌউবা, লৌদা তাবা তিলহাত-হিদাক্কী মরমদা অপুনবা মীয়ামগী শিল-লাংবগী থৌরমশিং অমসুং লৌউ-শিংউদা শক্তি শিজিন্নবগী শিল-লাংবা অসিনচিংবনি৷ মুন্না খন্নরবা ৱাফমদা য়ুম্ফম ওইবা অয়াবা শকখঙ্-ৱারোলশিং লেপ্তনা থবক্কীদমক য়াত্থোক্তুনা ইখ্রবনি৷ অসিগীসু মথক্তা, লৌউ-শিংউবগী মরীদা লৈরিবা খুন্নায় অমসুং বিজ্ঞানগী লৌশিংবু শেমগতপা অমসুং শন্দোক্নবগীদমক তঙায়ফদনা চংলিবা খুতহৈ (মেকানিজম) অদুবু হেঙ্গতহন্নবা অমসুং পাকথোক-চাওথোকহন্নবা এন কে সিনা লৌউ-শিংউগী থি-হুম্বগী থবক অমসুং শাংদোক্নঙায় ওইবা পথাপশিং পায়খতখ্রে৷
|
|
|
